Il-Qorti Suprema fl-Arabja Sawdija kkonfermat is-sentenza ta’ 1,000 daqqa ta’ frosta u għaxar snin ħabs għall-blogger Raif Badawi. Dan minkejja l-għagħa li kien hemm madwar id-dinja.
L-aħbar ingħatat minn martu li marret tgħix il-Kanada.. Ensaf Haidar qalet li issa l-kundanna kienet finali.
Badawi kien arrestat fl-2012 u akkużat li kien insulenta r-reliġjon Iżlamika fuq mezzi elettroniċi. Badawi kien imexxi Liberal Saudi Network, blog li biha kien iħeġġeġ id-diskussjoni reliġjuża u politika fuq is-sit tiegħu.
L-awtoritajiet fl-Arabja Sawdija, wara l-għagħa li kien hemm meta tħabbret is-sentenza, kienu talbu għal reviżjoni tal-każ. Dan wara li Badawi kien diġà ngħata l-ewwel 50 daqqa ta’ frosta mis-sentenza f’Jannar. Skont rapport mediku, Badawi ma jiflaħx aktar daqqiet ta’ frosta għaliex hemm periklu li jmut.
