Is-sitwazzjoni fl-Ukrajna kienet it-tema li ddominat is-summit tal-G7 – is-seba’ pajjiżi l-aktar sinjuri fid-dinja – fil-Kastell ta’ Elmau fil-Ġermanja.
Dan apparti l-bdil fil-klima dinjija, l-estremiżmu u l-kummerċ internazzjonali.
Il-grupp s’issa kien magħruf bħala l-G8 imma din is-sena r-Russja ma kinetx mistiedna tattendi minħabba l-aġir fl-Ukrajna – it-tema dominanti tas-summit. Dan hekk kif hemm tħassib li l-President Russu Vladimir Putin qed ikompli jżid il-pressjoni militari fl-Ukrajna apparti li Moska diġà qed tħabbat wiċċha ma’ sanzjonijiet imposti kemm mill-Istati Uniti kif ukoll mill-Ewropa.
Dan fl-isfond ta’ ħidma bejn il-Ġermanja, ir-Renju Unit u l-Istati Uniti biex jingħata appoġġ lil dawk il-pajjiżi membri tal-UE li jikkunsidraw li jirtiraw mis-sanzjonijiet kontra r-Russja għaliex dawn ikunu qed iħallu impatt fuq l-ekonomija tagħhom ukoll kif ukoll għaliex is-sanzjonijiet mill-UE jiskadu f’Lulju.
Putin min-naħa tiegħu s-Sibt insista li r-Russja ma kinetx ta’ theddida għall-Ewropa u kellu affarijiet oħra li kienu qed jinkwetawh. Hu żied li bniedem mitluf minn sensih biss kien jgħaddilu minn moħħu li jattakka pajjiż membru tan-NATO.
Philip Hammond, is-Segretarju tad-Difiża Ingliż, filwaqt li esprima t-tħassib tiegħu għall-mod kif ir-Russja qed tissaħħaħ militarment, eskluda l-possibbiltà li missili nukleari Amerikani jerġgħu jitpoġġew fl-Ewropa.
Hu qal li din kienet biċċa delikata peress li filwaqt li kien hemm bżonn li wieħed juri biċ-ċar li kien hemm limitu, wieħed ukoll ried jifhem li r-Russja tħossha mdawra u taħt attakk u wieħed irid joqgħod attent li ma joħloqx inċident serju li malajr jista’ jintilef il-kontroll tiegħu.
