Bastimenti tal-gwerra minn diversi pajjiżi Ewropej kienu impenjati f’ħidma ta’ salvataġġ ta’ madwar 3,000 immigrant irregolari fil-Baħar Mediterran.
Il-Migrant Offshore Aid Station (MOAS) bażat f’Malta qalet li ikkoordinat il-ħidma ta’ bastimenti tal-gwerra Taljani, Irlandiżi, Ġermaniżi u Ingliżi fil-ħidma ta’ salvataġġ hekk kif intlemħu diversi laneċ mimlija immigranti ħerġin mill-ibħra Libjani.
B’kollox ilbieraħ intlemħu 14-il lanċa diretti lejn l-Ewropa mil-Libja.
Il-kaptan tal-HMS Bulwark Nick Cooke-Priest, il-bastiment tar-Royal Navy li qed jgħasses l-ibħra barra l-Libja, qal li l-indikazzjonijiet huma li hemm bejn 450,000 u 500,000 immigrant irregolari jistennew fil-Libja biex jaqsmu l-Mediterran lejn l-Ewropa.
Michael Fallon, is-Segretarju tad-Difiża Ingliż, qal li kien hemm bżonn impenn akbar kontra l-immigrazzjoni fil-Mediterran fosthom biex is-soluzzjoni tal-problema tinstab fl-għeruq tagħha
Fl-isfond ta’ dan kollu, mil-Libja ħarġu rapporti li membri tal-ISIS fil-Libja ħatfu 86 Nisrani mill-Eritrea waqt li kienu qed jivvjaġġaw lejn Tripli. L-aħbar ingħatat minn Meron Estefanos, mill-għaqda ‘International Commission on Eritrean Refugees’ bażata fl-Iżvezja.
Jidher li l-militanti Iżlamiċi interċettaw grupp ta’ immigranti u sseparaw l-Insara mill-Musulmani u ħallew dawn tal-aħħar jaħarbu li imbagħad żvelaw x’kien ġara.
Skont Estefanos il-każ seħħ fit-3 ta’ Ġunju u fil-grupp kien hemm 12 bejn nisa u tfal.
