Mit-Tlieta f’Magaluf – destinazzjoni popolari maż-żgħażagħ Ewropej fil-gżira Spanjola ta’ Majorca – se jidħlu fis-seħħ liġijiet ġodda biex irażżnu x-xalar żejjed fit-toroq.
Fost l-oħrajn min jinqabad f’aġir mhux xieraq lil jdejjaq il-ġirien se jkun arrestat u se jkun hemm ukoll multi għoljin. Dan apparti li se tissaħħaħ il-preżenza tal-Pulizija fit-toroq b’36 uffiċjal.
Magaluf hi partikolarment popolari maż-żgħazagħ Ingliżi u huma magħrufa għall-inkwiet li jaqilgħu.
Issa mit-Tlieta, il-konsum tax-xorb alkoħoliku bejn l-10 pm u t-8am fit-toroq se jkun projbit u l-ħwienet ma jistgħux ibigħu xorb alkoħoliku wara nofsillejl. Min jinqabad jimxi għarwien fit-toroq jew jagħmel il-bżonnijiet tiegħu fit-toroq jew jgħum għarwien se jkun immultat bejn 750 u 3,000 ewro u l-istess għall-ħbieb li jkunu qed jakkumpanjawhom u li ma jwaqqfuhomx.
