Fi stqarrija l-Partit Nazzjonalista nnota l-attakk li fetaħ il-Prim Ministru Joseph Muscat fuq impjegati tal-Gvern, sempliċiment għaliex allegatament jassoċjaw rwieħhom mal-Partit Nazzjonalista.
Il-Partit Nazzjonalista fl-istqarrija fakkar lil Joseph Muscat li f’Malta teżisti demokrazija u soċjetà ħielsa, li tippermetti lil kull individwu jassoċja ruħu ma’ liema partit jixtieq hu. Il-Partit Nazzjonalista sa]aq li mhu se jippermetti lil ħadd, wisq aktar lill-Prim Ministru, li jiprova jagħmel kampanja kontra ħaddiema tal-Gvern, sempliċiment għaliex ma jaqblux miegħu politikament.
“Muscat kien għamel kampanja elettorali sħiħa jgħid li anke kull min ma jaqbilx miegħu, jista’ jaħdem miegħu. Madanakollu, issa huwa ċar li dik kienet biss ħrafa elettorali għaliex Muscat għażel li jitkellem dwar vendikazzjonijiet kontra min ma jaqbilx miegħu.”
Il-Partit Nazzjonalista qal li hu lest li jiddefendi lil kull Malti u Maltija – nkluż dawk li jaħdmu mal-Gvern – li jesprimu lilhom infushom kif iħossuhom komdi, mingħajr ma jkunu obligati jxejru biss il-bandiera ta’ Joseph Muscat.
