Raġel ta’ 68 sena ntbagħat 9 snin ħabs wara li nstab ħati li rabat tifla ta’ seba’ snin ma’ sodda u abbuża sesswalment minnha f’każ li seħħ fl-2002.
William Gatt ingħata l-kastig massimu mill-Maġistrat Audrey Demicoli li semgħet kif fl-2010 l-Pulizija Maltija rċeviet komunikazzjoni mingħand l-Interpol wara li l-Pulizija Ingliża daħlilha rapport dwar abbuż li għaddiet minnu tifla taħt l-età waqt li kienet qed tgħix f’San Pawl il-Baħar mal-familja tagħha tmien snin qabel.
It-tifla ammettiet li kienet qed tiġi abbużata meta għalqet 13-il sena u rrakkontat kollox lil counsellor fl-iskola tagħha wara tentattiv biex tweġġa’ lilha nnifisha fl-istess skola minħabba t-trawma li għaddiet minnha.
Gatt kien ammetta li t-tifla kienet marret id-dar tiegħu biex tara l-pets li kellu imma kien qed jiċħad li abbuża minnha.
It-tifla, imma, spjegat id-dettalji kollha u qalet ukoll li kien heddidha li joqtol lill-membri tal-familja tagħha jekk tikxfu.
