L-istudenti tal-filosofija fl-Università ta’ Malta ma jaraw l-ebda benefiċċju għall-gżejjer Maltin fil-bini ta’ università ġdida
Il-Kumitat Eżekuttiv tas-Soċjetà tal-Istudenti tal-Filosofija (SPS) fl-Università ta’ Malta wkoll ħa pożizzjoni kontra l-iżvilupp ta’ università f’ODZ fiż-Żonqor.
Fi stqarrija li ħarġet ilbieraħ is-Soċjetà qalet li wara li saret diskussjoni fi ħdanha, iddeċidiet li tiddikjara n-nuqqas ta’ qbil tagħha mal-mod kif il-Gvern qed imexxi l-proposta tal-kostruzzjoni tal-Università Amerikana f’Malta.
Il-Kumitat Eżekuttiv tal-SPS iddikjara li hu unanimament kontra dawn il-pjani biex tinbena università fil-Ponta taż-Żonqor li hija skedata bħala zona ODZ.
L-istqarrija tkompli l-organizzazzjoni hi konvinta li l-klassifikazzjoni taż-Żonqor bħala Outside Development Zone (ODZ) għandha tkun rispettata u għalhekk m’għandha bl-ebda mod tintmess, kif m’għandha tintmess l-ebda art li mhix skedata għall-iżvilupp.
Aktar minn hekk, tkompli tgħid l-SPS, bħala organizzazzjoni tal-istudenti fl-Università ta’ Malta mhix konvinta dwar il-benefiċċji li jista’ jkun hemm għall-gżejjer Maltin bil-ftuħ ta’ din l-università – sew jekk din issir f’Zonqor Point kif ukoll jekk issir f’post ieħor.
Riżultat ta’ dan kollu, tkompli l-istqarrija, is-Soċjetà tal-Istudenti tal-Filosofija ddeċidiet li tiddikjara l-appoġġ tagħha għall-isforzi tal-Front Ħarsien ODZ kontra dan l-iżvilupp.
Is-Soċjetà temmet tgħid li mistennija tagħmel il-pożizzjoni tagħha aktar ċara u b’mod aktar dettaljat wara li ssir konsultazzjoni mal-membri.
