Il-kunċett ta’ Moviment li tant kien jitkellem dwaru u jwiegħed Joseph Muscat bħala Mexxej tal-Partit Laburista, u li wasslitu biex rebaħ l-elezzjoni ġenerali tal-2013, jista’ jwassal biex dan idur kontrieh fl-elezzjoni ġenerali li jmiss fl-2018. Dan qalu s-Soċjologu Michael Briguglio f’artiklu li kiteb f’gazzetta lokali.
Fl-artiklu, Briguglio jgħid li l-kunfidenza żejda li qed juri l-Gvern Laburista u li qed twassal għall-arroganza, normalment wieħed jistennieha wara xi żewġ Leġiżlaturi u mhux wara sentejn.
Sena ilu, il-Partit Laburista fil-Gvern kien jidher li ma jista’ jerbaħlu ħadd u kien invinċibbli. Iżda kollox beda juri xorta oħra mal-każ tal-eks Ministru Manwel Mallia, bl-isparatura tax-xufier tiegħu fil-konfront ta’ persuna oħra. Dak il-każ wera kif l-islogan Malta Tagħna Lkoll kien biss logħob bil-kliem.
Minn dak l-inċident, kompla jikteb Michael Briguglio, minflok ma bdiet tinkiteb paġna oħra bil-meritokrazija u l-ġid komuni, fost wegħdiet oħrajn, spiċċaw biex ħarġu stejjer oħra li tappnu l-kredibbiltà tal-Gvern.
L-artiklu kompla li f’dan it-tip ta’ kuntest politiku, il-Partit Nazzjonalista għandu sentejn u nofs ċans biex juri li ġġedded u li jista’ jkun gvern alternattiv, billi jippromwovi stabbiltà u kwalità ta’ ħajja diċenti għall-poplu. Semma’ wkoll kif il-maġġoranza fil-voti tista’ tispiċċa bl-istess mod li kienet miksuba.
Michael Briguglio fakkar ukoll fil-protesta li se ssir is-Sibt li ġej mill-Front Ħarsien ODZ, fl-10am quddiem il-Parlament, bl-iskop li l-Gvern jisma’ minn dak li qed jgħidulu eluf ta’ nies ħalli ma jibnix Università għal studenti barranin f’żona ‘l barra mill-iżvilupp fiż-Żonqor f’Marsaskala.
