Kif żvelat il-gazzetta il-Mument tal-Ħadd li għadda, l-MCAST, il-Kulleġġ tal-Arti, Xjenza u t-Teknoloġija nieda d-dettalji tat-tibdil fil-ħidma tiegħu fejn minn 11-il istitut se jinqasam fi 3 kulleġġi li joffru tagħlim fil-livelli differenti li jkunu fihom l-istudenti. Permezz ta’ dan it-tibdil u wkoll minħabba l-avviż legali l-ġdid tal-edukazzjoni, l-MCAST se jibda joffri korsijiet fil-livell ta’ Masters.
It-tliet kulleġġi se jkunu, tal-Fondazzjoni, għall-istudenti li jidħlu bejn l-ewwel u t-tielet livell ta’ edukazzjoni, il-Kulleġġ Tekniku gġall-istudenti fir-raba’ livell, u l-Kulleħħ Universitarju li se jkun għall-istudenti bejn il-livelli ħamsa u sebgħa.
Bit-tibdil fl-avviż legali fl-edukazzjoni, l-MCAST, fejn qabel kien qed joffri edukazzjoni sas-6 livell, issa se jkun qed joffri korsijiet sal-livell ta’ Masters.
It-tibdil fl-MCAST hu mifrux fuq tliet snin, bejn l-2015 u l-2016 se jitwaqqfu t-tliet kulleġġi tal-fondazzjoni, dak tekniku u wkoll dak universitarju, bejn l-2017 u l-2018 se titfassal ir-responsabbilta’ kurrikulari u fis-snin bejn l-2018 u l-2019 se ssir il-ħidma fuq l-iżvilupp kurrikulari bejn kulleġġ ieħor.
Bit-tibdil fl-MCAST, ser ikun hemm sitt istituti fit-tliet kulleġġi, flok il-ħdax li hemm bħalissa. L-istituti se jkunu tal-Inġinerija u t-Trasport, Negozju, ICT, Arti Kreattiva, Xjenza Applikata u Servizzi fil-Komunita’.
