Christian Coleiro, ta’ 26 sena minn Ħaż-Żebbuġ, illum tressaq il-Qorti akkużat li pprova jipparteċipa f’att sesswali fuq l-internet ma’ tfal taħt l-età, kif ukoll li għandu fil-pussess tiegħu materjal indiċenti ta’ minorenni. Hu wieġeb mhux ħati tal-akkużi miġjuba kontrieh.
L-istorja, żvelata f’pajjiżna s-Sibt li għadda minn MaltaRightNow.com, titratta filmat li ttella’ fuq paġna ta’ Facebook immexxija minn grupp ta’ Amerikani. Ir-raġel li tella’ l-filmat aġixxa daqslikieku kien tifla ta’ 13-il sena li lesta tinża’ għarwiena f’chat fuq Skype. Kif l-Amerikan qal li hu tifla ta’ 13-il sena, il-Malti, li kellu l-webcam mixgħula, wieġeb “tajjeb”.
Madankollu, iċ-chat intemmet malajr hekk kif l-Amerikan identifika ruħu. Fil-Qorti, Coleiro qed jiġi difiż mill-Avukati Toni Abela u Maria Borg, li min-naħa tagħhom talbu li l-identità taż-żagħżugħ tkun protetta. Din it-talba ma ntlaqatx mill-Maġistrat Ian Farrugia, li talab biss li ma jixxandrux id-dettalji tal-każ u dak li ħareġ mill-investigazzjonijiet tal-Pulizija.
Coleiro ngħata l-libertà proviżorja fuq depożitu ta’ €500 u garanzija personali ta’ €2,000. Il-Prosekuzzjoni qed titmexxa mill-Ispettur Joseph Busuttil mis-Sezzjoni tas-Cyber Crime.
