William Gatt, anzjan ta’ 68 sena, ingħata s-sentenza massima ta’ disa’ snin priġunerija wara li nstab ħati li 13-il sena ilu rabat tifla ta’ seba’ snin ma’ sodda u stupraha. Quddiem il-Maġistrat Audrey Demicoli, sar magħruf li fl-2010, il-Pulizija rċeviet rapporti mingħand l-Interpol wara li l-Pulizija Ingliża kkwotat rapport li t-tifla sofriet l-abbuż meta fl-2002 kienet tgħix f’San Pawl il-baħar.
It-tifla tkellmet mal-Counsellor li meta kellha bejn seba’ u tmien snin, kienet tgħix mal-familja tagħha f’pajjiżna. Stqarret li meta kienet tkun qed tilgħab ma’ ħbieb tagħha fit-triq, ġieli kienet tkun mistiedna mill-anzjan biex tmur tilgħab mal-qattus tiegħu fir-residenza tiegħu. Wara diversi drabi li ġara hekk, l-aħħar darba li marret, hu ħadha fil-kamra tas-sodda, fejn rabatha mas-sodda u stupraha.
Matul l-interrogazzjoni, Gatt kien ammetta li kienu jieħu lit-tifla d-dar tiegħu, iżda ċaħad li abbuża sesswalment minnha. Min-naħa l-oħra, ammetta li kien jieħu gost jagħmel atti sesswali fuq u fil-preżenza ta’ tfal żgħar, għalkemm qal li kien jagħmel hekk minħabba li kellu problemi ta’ alkoħol.
Min-naħa tagħha, meta xehdet permezz ta’ video conferencing, it-tifla qalet lill-Qorti li qatt ma tkellmet ma’ ħadd dwar l-abbuż mill-anzjan, iżda ta’ spiss kienet tbati minn dipressjoni minħabba t-trawma li sofriet. Filwaqt li spjegat il-mod kif ġiet abbużata, spjegat lill-Qorti li l-anzjan beda jheddidha li se joqtol membri tal-familja tagħha jekk titkellem ma’ xi ħadd dwar dak li ġara.
L-anzjan sostna li hu qatt ma mess lit-tifla, ħlief meta darba sabha tqalliblu fil-kxaxen u tefagħha ‘l barra mid-dar. Qal li t-tifla kienet qed tigdeb u li l-allegazzjonijiet kienu instigati minn missierha li xtaq jissellef Lm2,000 mingħandu. Fil-Qorti, Gatt qal li l-Pulizija qatt ma tagħtu ċans jispjega l-fatti, filwaqt li kkjarifika li meta qalilhom li kien iħobb lill-bniet, xtaq jirreferi għall-adulti u mhux il-minorenni. Hu ċaħad ukoll li qal lill-Pulizija li kien iħobb jagħmel atti seswali quddiem minorenni.
Meta kienet qed tagħti s-sentenza, il-Maġistrat Demicoli qalet li l-attitudni tat-tifla waqt li kienet qed tixhed uriet li t-tifla kienet qed tgħid il-verità, kif ukoll li għadha trawmatizzata. Sostniet li ma tista’ tara l-ebda raġuni għalfejn it-tifla setgħet toħroġ b’xi storja bħal din, li kieku qatt ma għexitha verament. Għaldaqstant, il-Qorti sabet lil Gatt ħati u tatu sentenza massima ta’ disa’ snin priġunerija.
Il-Prosekuzzjoni tmexxiet mill-Ispettur Louise Calleja.
