Ħafna jiftakkru lil Ronnie Pellegrini bħala persuna qrib l-eks Ministru Laburista Lorry Sant u bħala attivist u Uffiċjal tal-General Workers Union. Iżda issa, skont id-Dipartiment tal-Informazzjoni, hu ċ-Chief of Staff tal-Ministeru tal-Libertajiet Ċivili, imexxi minn Helena Dalli. Madankollu, meta mistoqsija, Helena Dalli giddbet lis-sit uffiċjali tal-Gvern u ma riditx tgħid x’qed jagħmel fil-Ministeru tagħha.
L-involviment ta’ Ronnie Pellegrini fil-Partit Laburista jmur lura mis-sebgħinijiet u t-tmeninijiet meta Pellegrini kien wieħed mill-persuni qrib ħafna tal-eks Ministru Laburista Lorry Sant. Fl-intervista ma’ The Malta Independent, il-Ministru Dalli ma spjegatx kif Pellegrini hu mniżżel bħala ċ-Chief of Staff fil-Ministeru tagħha, iżda qalet li m’għandha l-ħadd jokkupa dik il-kariga fil-Ministeru. Minflok, qalet li Ronnie Pellegrini hu biss Uffiċjal tas-Segretarjat tagħha.
Minbarra li qrib ħafna tal-eks Ministru Laburista Lorry Sant, Ronnie Pellegrini kien ukoll attivist u Uffiċjal tal-GWU, għalkemm ma baqax fil-Union wara diżgwid mal-grupp li kien jappoġġja lis-Segretarju Ġenerali Toni Zarb. Fix-xhur li għaddew, il-Ministru Dalli kienet ukoll fil-qofol ta’ kontroversja politika wara xogħlijiet irregolari li kienu qed isiru fil-farmhouse tagħha fiż-Żejtun.
