Għar-raba’ darba
, l-artisti tal-graffiti kitbu mill-ġdid il-messaġġ “The world is full of kings and queens that blind your eyes and steal your dreams.”
Dan minkejja li darba wara l-oħra ħaddiema tal-Gvern intbagħtu jnaddfu u jiżbgħu mill-ġdid dan il-ħajt.
4 ta’ Lulju: Il-graffiti b’messaġġ li nkiteb ma’ ħajt taħt Bieb il-Bombi reġa’ nkiteb mill-ġdid għat-tielet darba minkejja li tneħħa ripetutament minn ħaddiema tal-Gvern.
Din id darba fil-messaġġ hemm żball, meta min kiteb il-messaġġ, kiteb il-kelma ‘seal your dreams’ minflok ‘steal your dreams’.
12 ta’ Ġunju li għadda: Il-ħajt kollu ta’ taħt Bieb il-Bombi fil-Furjana issa ngħata kisja żebgħa bajda biex mhux biss tneħħiet is-swidija li kienet tikkaratterizzah imma wkoll graffiti li minkejja interventi li saru reġgħet inkitbet jumejn biss wara li tgħattiet.
L-intervent seħħ ilbieraħ meta kl-karreġġjata ta’ taħt Bieb il-Bombi ngħalqet għal kollox, fost l-oħrajn b’żewġ muturi tal-Pulizija, waqt li ħaddiema kienu qed jiżbgħu bl-abjad il-ħajt kollu.
Kollox beda meta graffiti li kienet saret is-sena li għaddiet faċċata tal-bus stop ta’ taħt Bieb il-Bombi, fil-Furjana, fl-aħħar jiem tgħattiet b’żebgħa bajda u tneħħiet għal kollox.
Il-graffiti kienet kitba b’messaġġ li jgħid: “The world is full of kings and queens that blind your eyes and steal your dreams.”
Jumejn biss wara li dan is-sit ħabbar li l-graffiti fil-Furjana tgħattiet b’żebgħa bajda, persuna jew persuni mhux magħrufa kitbu mill-ġdid il-kliem “The world is full of kings and queens that blind your eyes and steal your dreams.”
It-tneħħija ta’ din il-graffiti qajmet reazzjoni negattiva minn ħafna. persuni li tkellmu magħna spjegaw kif dan il-ħajt kien sar attrazzjoni f’żona li sfortunatament hi magħrufa biss għat-traffiku u t-tniġġis tal-eluf ta’ karozzi li jgħaddu minnha.
Fuq Facebook, ir-ritratt tal-ħajt bi rqajja taż-żebgħa bajda li ntużat biex titgħatta l-graffiti, ġie deskritt minn numru ta’ żgħażagħ bħal “karta tal-eżami mimlija tippex.” Oħrajn komplew li biex tneħħa dak li ġie deskritt bħala vandaliżmu, sar vandaliżmu ieħor li iktar kerrah iż-żona.
