Transport Malta baqgħet ma wiġbitx mistoqsijiet ta’ maltarightnow.com dwar jekk ittiħditx azzjoni fuq xufier li qatta’ aktar minn kwarta jitgħajjar politikament ma’ passiġġier filwaqt li jxejjer idu u jsuq b’id waħda, anke fil-kantunieri.
Ix-xufier tal-linja, li t-Tnejn 30 ta’ Ġunju kien qed jopera r-rotta 52 li fid-9pm telqet mill-Belt lejn Ħad-Dingli, beda argument jaħraq ma’ passiġġier, li saħansitra żviluppa f’tgħajjir personali u politiku. Fost l-oħrajn, ix-xufier ta’ fehma Laburista nstema’ jgħajjar lin-Nazzjonalisti “ħallelin” u “korrotti”, fost sensiela ta’ aġġettivi oħra.
Kollox beda meta x-xufier kien qed jistenna l-ħin fit-Terminus ta’ ħdejn ir-Roman Villa fir-Rabat. Hawn telgħet koppja, li bdew jilmentaw li ilhom ġimgħatejn li applikaw għal TalLinja Card, iżda din baqgħet ma waslitx, filwaqt li bdew iwaħħlu fil-Ministru tat-Trasport Joe Mizzi għal din l-ineffiċjenza.
Fil-pront qabeż raġel ieħor, li fakkarhom li issa jridu jibdew iħallsu kull sagħtejn. Kien hawn li x-xufier irrisponda u beda jargumenta u jaqbeż għall-Partit Laburista. L-argument baqa’ sejjer, minkejja li x-xufier sarlu l-ħin u beda jsuq lejn Ħad-Dingli.
Il-fatt li beda jitkellem politikament ifisser li dan mar kontra r-regoli tal-impjieg mal-kumpanija tat-trasport pubbliku. L-argument wassal biex għal xi mumenti kien hemm saħansitra passiġġiera oħra li spiċċaw jitgħajjru bejniethom.
Madankollu, u minkejja l-provi ta’ dan l-inċident, Transport Malta għadha ma wiġbitx għal mistoqsijiet dwar jekk ittiħditx azzjoni. L-unika risposta kienet li l-email tagħna waslet għand Transport Malta u li l-każ qed jingħata l-attenzjoni mistħoqqa.
