Xufier tal-vettura tal-linja numru 406 qatta’ ħames sigħat wieqaf sakemm qabżitlu u abbanduna l-vettura f’nofs Triq Diċembru 13.
Jirriżulta li malli l-vettura waqfet għall-ewwel darba, wasal fuq il-post mekkanik li startja l-vettura. Imma eżatt kif telaq, din reġgħet waqfet mill-ewwel ftit bogħod minn fejn waqfet l-ewwel darba.
Minkejja li rraporta mill-ewwel, ix-xufier qatta’ kważi ħames sigħat fis-sħana sakemm qabżitlu u ħalla l-vettura fejn kienet, f’nofs ta’ triq.
Jirriżulta li dan hu biss wieħed minn ħafna każi simili fl-aħħar jiem marbuta mal-istess vettura. Fil-15 ta’ Lulju li għadda, il-paġna Waqfet Tal-Linja kienet diġa’ tellgħet episodju ieħor fejn din il-vettura waqfet minħabba problema fil-batterija, wara li kienet waqfet lejliet ukoll.
Xufiera li tkellmu magħna spjegaw kif dan l-episodju hu komuni ħafna, għaliex il-kumpanija għandha nuqqas kbir ta’ mekkaniks.
Ritratt: Waqfet Tal-Linja
