Is-sħana li nieżla bħalissa fuq Nikosija u bnadi oħra ta’ Ċipru tant hi qalila li spiċċaw idubu s-sistemi tal-isteering tal-karozzi; b’ħafna residenti jibgħatu ‘statuses’ fuq il-media soċjali fejn jaqsmu l-esperjenzi tagħhom b’kaġun tat-temperaturi eżaġerati.
Persuna fuq Twitter bagħtet ritratt ta’ tagħmir speċifiku fit-toroq li qed jirreġistra temperaturi ta’ 57 grad Celsius. Dan waqt li kelliema għall-aġenziji tal-ivvjaġġar qalu li ‘t-temperaturi attwali f’Ċipru, is-soltu, huma aktar assoċjati ma’ pajjiżi bħall-Iraq’.
It-turisti Britanniċi ngħataw diversi twissijiet rigward il-vjaġġi lejn Ċipru, fejn qed ikunu avżati biex jevitaw il-bajjiet fil-ħin nofsinhar, meta x-xemx tkun l-aktar tisreġ ‘u biex huma ifittxu kemm jistgħu l-postijiet kennija’.
It-turisti li qed iqattgħu btajjel f’Ċipru huma wkoll imwissija biex jixorbu ħafna ilma u jieħdu vantaġġ mis-sistemi tal-airconditioning tal-lukandi.
Sadanittant, komplew deħlin l-istejjer dwar is-sħana inkredibbli f’dan il-pajjiż, fosthom każ ‘fejn residenta kellha tpoġġi l-iPhone tagħha fil-fridge biex dan ikompli jaħdem’.
