Il-blat f’Dellimara ċeda b’qawwa tant li hezzez l-art

Aġġornata

Il-blat li lbieraħ ċeda f’Dellimara, ċeda b’tant qawwa li hezzez l-art b’mod li għall-ewwel, it-thezziza ġiet reġistrata mill-Grupp ta’ Moniteraġġ u Riċerka Siżmika tal-Universita’ ta’ Malta bħala terremot.

Filfatt it-thezziza li ġiet reġistrata fil-ħamsa neqsin żewġ minuti fl-istazzjon siżmiku f’Wied Dalam f’Birżebbuġa minn dan il-grupp, ma kienet xejn għajr riżultat tal-impatt qawwi li l-blat li ċeda kellu meta waqa’ l-baħar.

F’stqarrija li ħarġet dalgħodu ġie ċċarat li s-sinjal li ġie rreġistrat fl-istazzjon ta’ Wied Dalam f’Birżebbuġa kif ukoll fl-istazzjon siżmiku fl-Universita’, ma kienx terremot iżda thezziza kawża tal-impatt tal-blat li waqa’ l-baħar.

F’kuntatt ma’ MaltaRightNow.com, kelliema mid-Dipartiment tal-Ġeoxjenza fl-Universita’ ta’ Malta qalet li għal bidu ġiet reġistrata t-thezziza, li bil-metodu ta’ kif jitkejjel terremot, kienet kalkulata 2.3 fuq l-iskala Richter. Madanakollu, wara ħarsa aktar fil-dettal mill-istess Dipartiment, irriżulta li t-thezziza ma kinitx kawża ta’ terremot.

Mistoqsija minn MaltaRightNow.com jekk hemmx mod kif it-thezziza tkun kwantifikata fuq l-iskala Richter, biex titkejjel il-qawwa tat-thezziza, il-kelliema mid-Dipartiment tal-Ġeoxjenza qalet li dan mhux possibbli peress li l-metodu biex jitkejjel terremot hu differenti minn kif titkejjel thezziza li m’hijiex kawża ta’ terremot.

Agħhas hawn għal dettalji ta’ dak li seħħ illum f’Dellimara kif ukoll xhieda ta’ persuna li kien fl-inħawi meta ċeda l-blat.

Ritratt: Għall-ewwel, il-magni tad-Dipartiment tal-Ġeoxjenza fl-Universita’ ta’ Malta mmarkaw thezziza li kkalkulat li kienet ġejja minn terremot ta’ 2.3 fuq l-iskala Richter. Aktar tard, wara ħarsa aktar fid-dettall, irriżulta li t-thezziza kienet konsegwenza tal-blat li ċeda f’Dellimara.

Ritratt: il-ħofra fil-blat wara li ċediet massa ta’ blat