Raġel ta’ 62 sena u mara ta’ 56 sena sofrew ġrieħi gravi meta ntlaqtu minn biċċiet t’injam kawża ta’ murtal.
Il-każ seħħ ilbieraħ filgħaxija, ftit qabel l-10pm, f’farmhouse fl-inħawi ta’ Wied iż-Żurrieq.
Minn stħarriġ preliminari jirriżulta li r-raġel u l-mara, t-tnejn residenti l-Kalkara, kienu fost numru ta’ nies oħra li ddeċidew joħorġu mill-bini hekk kif beda jinħaraq in-nar tal-ajru fil-viċin. Madankollu, hekk kif kienu ħerġin, murtal laqat xi injam u tajjar ammont ta’ biċċiet li laqathom f’wiċċhom.
Aktar stħarriġ biex jiġi stabbilit eżatt x’wassal għal dan għadu għaddej mill-Għassa taż-Żurrieq.
