Hemm rabja u għadab għall-funeral kbir li sar lil kap tal-Mafja Taljan. Fost affarijiet oħra li saru, twaddbu petali tal-ward minn ħelikopter fuq it-tebut. It-tebut inġarr f’karru miġbud minn żwiemel imżejna u akkumpanja d-daqq tal-mużika mill-film ‘The Godfather’ minn banda.
Il-funeral kien ta’ Vittorio Casamonica, ta’ 65 sena, u fuq il-faċċatta tal-Knisja ta’ San Giovanni Bosco, fil-periferiji ta’ Ruma, fejn sar il-funeral, twaħħlu posters li jiddeskrivuh bħala “r-Re ta’ Ruma”.
Casamonica kien wieħed mill-mexxejja ta’ grupp Mafjuż imdaħħal fit-traffikar tad-droga u r-rikatti, u l-mod kif sar il-funeral kien deskritt minn ħafna politiċi Taljani bħala sfida lill-awtoritajiet.
Ignazio Marino, is-Sindku ta’ Ruma, li kien irrifjuta li jirriżenja minħabba investigazzjoni dwar il-Mafja fit-tmexxija tal-belt kapitali Taljana, talab spjegazzjoni mill-bqija tal-kunsill għal kif seta’ jkun hemm funeral simili fit-toroq ta’ Ruma mingħajr ħadd ma jitniffes.
