Il-Gvern Awstrijak ħabbar li nstabu aktar minn 200 immigrant, xi sigħat wara li l-pajjiż issikka l-kontrolli mal-fruntiera komuni mal-Ungerija. Intant, ħames traffikanti tal-bnedmin spiċċaw arrestati, bl-awtoritajiet fi Vjenna jżidu l-kontrolli .
Il-Ministru Awstrijak għall-Intern, Johanna Mikl-Leitner, qal li l-kontrolli ma kenux ‘il-miżuri klassiċi għall-ħarsien tal-fruntiera’ . Hi spjegat ukoll li Vjenna, f’dan il-każ, ma kenitx qed tikser il-ftehim ta’ Schengen li jirrikjedi moviment ħieles bejn il-fruntieri tal-Ewropa.
L-awtoritajiet Awstrijaċi qegħdin jieħdu azzjoni speċifika fil-konfront tat-traffikanti wara s-sejba, il-ġimgħa l-oħra, ta’ 71 katavru ta’ immigranti fi trakk abbandunat.
Sadanittant, il-gwardjani tal-kosta tal-Greċja tellgħu kważi 2,500 immigrant mill-baħar wara għexieren ta’ missjonjiet tat-tip search and rescue li saru fi tmiem il-ġimgħa. Dawn l-immigranti huma parti minn eżodu kbir ta’ nies li qed jaħarbu mill-gwerrer u l-faqar fil-Lvant Nofsani, l-Afrika u l-Asja bit-tama li jsibu s-sigurtà fl-Ewropa.
