Fiċ-ċentru tal-Greċja, fis-sigħat bikrin tal-Erbgħa waslu aktar minn 4,000 immigrant fil-port ta’Piraeus. Dawn twasslu bil-vapur mill-gżira Griega ta’ Lesbos fejn kienu żbarkaw.
Dan hekk kif l-Unjoni Ewropea qed tistinka biex issib linja komuni biex tikkonfronta din il-kriżi. Kelliem għall-Kummissjoni Ewropea qal li kienet qed titlesta proposta għal mekkaniżmu biex awtomatikament jitqassmu dawk li qed ifittxu kenn fil-pajjiżi tal-Unjoni Ewropea.
L-Italja u l-Greċja qed jilmentaw li ma jifilħux aktar għall-wasla kontinwa ta’ immigranti.
Tul il-ġimgħa li għaddiet, il-Greċja rreġistrat il-wasla ta’ 23,000 immigrant li skont il-Frontex kienet żieda ta’ 50 fil-mija mal-ġimgħa ta’ qabel. Ħafna minn dawk li jaslu jiżbarkaw fil-gżira ta’ Lesbos fejn skont il-media Griega, tul il-ġimgħa li għaddiet kienet reġistrata l-wasla ta’ 17,500 immigrant.
Il-Gvern Grieg qed jinsisti li m’għandux riżorsi biex jieħu ħsieb daqstant nies imma gruppi ta’ voluntieri qed isostnu li hemm fejn il-Gvern jista’ jagħmel aktar. Hemm ukoll polemiki fl-Italja minħabba l-ammont kbir ta’ immigranti li qed ikunu salvati fil-Mediterran.
Il-kriżi qed titqies bħala l-agħar waħda fl-istorja moderna tal-Ewropa u qed tqanqal diversi polemiki madwar l-Unjoni Ewropea. F’Lulju biss kienu 107,500 l-immigranti li daħlu fl-UE u l-Ġermanja qed tikkalkula li din is-sena se tkun qed tagħti kenn lil 800,000 immigrant – erba’ darbiet aktar mit-total tas-sena li għaddiet.
Issa l-Ministri tal-Intern tal-Unjoni Ewropea se jiltaqgħu fi Brussell fl-14 ta’ Settembru biex jippruvaw jindirizzaw din il-kriżi.
