Il-kriżi tal-immigrazzjoni fl-Ewropa kompliet hekk kif wara jiem ta’ tensjoni fl-Ungerija fl-aħħar żviluppi il-gvern Ungeriż pprovda lill-immigranti rregolari b’karozzi tal-linja sabiex dawn iwassluhom mal-fruntiera bejn l-Ungerija u l-Awstrija. Fil-fatt fl-aħħar siegħat bosta immigranti rregolari qasmu l-fruntiera sabiex b’hekk issa jinstabu fl-Awstrija.
Minn naħa tiegħu l-gvern Awstrijakk qal bi qbil mal-gvern Ġermaniż li kien ser iħalli lil dawn l-immigranti jaqsmu u dan minħabba s-sitwazzjoni allarmanti fl-Ungerija. Huwa mifhum li l-maġġoranza ta’ l-immigranti għandhom bħala għan aħħari li jaslu l-Ġermanja li minn naħa tagħha tinstab lesta sabiex tieħu madwar 800,000 persuna din is-sena. Il-gvernijiet tal-Awstrija u tal-Ġermanja iżda wissew li filwaqt li kienu qegħdin jilqgħu lil dawn l-immigranti kienu xorta qegħdin jistennew li l-Ungerija tirispetta l-kwota ta’ immigranti rregolari li kellha tieħu. Sistema li l-Ungerija flimkien mar-Repubblika Ċeka, l-Islovakia u l-Polonja ilhom jagħmluha ċara li huma totalment kontra.
Minn naħa tagħhom fuq wiċċ l-immigranti li kienu qegħdin jaqsmu għal ġo l-Awstrija kienet ċara għejja kbira iżda fl-istess ħin sodisfazzjon kbir għal fatt li sa fl-aħħar kienu telqu mill-ħmar il-lejl li offriet l-esperjenza fl-Ungerija.
