Issa l-Kroazja wkoll qalet li ma tiflaħx għall-piż tal-immigranti li qed jaqsmu l-fruntiera tagħha bl-iskop li jmorru lejn pajjiżi oħra tal-Unjoni Ewropea.
Dan wara li eluf kbar ta’ immigranti din il-ġimgħa ma komplewx jaqsmu l-fruntiera Serba mal-Ungerija u minflok bdew imorru lejn dik mal-Kroazja. Dan seħħ minħabba li fil-bidu tal-ġimgħa, l-Ungerija temmet il-bini ta’ ħajt mal-fruntiera Serba u bdiet tarresta lil kull min jaqsam bla permess.
Hu stmat li din il-ġimgħa daħlu fil-Kroazja mal-14,000 immigrant. Il-Prim Ministru Kroat Zoran Milanovic qal li filwaqt li pajjiżu ma kienx se jagħlaq għalkollox il-fruntieri, ma riedx li l-pajjiż jispiċċa kalamita għall-immigranti. Hu qal li l-Kroazja f’dawn il-ġranet kienet uriet li kellha qalb imma qal li hu ried ifakkar kemm lill-pajjiżi ġirien kif ukoll lill-Unjoni Ewropa li l-Kroazja kellha moħħ ukoll u kienet taf fejn kienu l-interess u s-sigurtà tal-pajjiż.
Mijiet ta’ immigranti li qasmu l-fruntiera Kroata kienu qed jinġarru lura lejn il-fruntiera mal-Ungerija. Fuq in-naħa Ungeriża mbagħad hemm preżenza qawwija tal-forzi tas-sigurtà Ungeriżi.
Il-Kroazja, bħala reazzjoni għal din il-kriżi, għalqet sebgħa minn tmien inħawi ta’ qsim ta’ fruntiera mas-Serbja biex tipprova tikkontrolla xi ftit is-sitwazzjoni.
Beda jbaqbaq l-inkwiet mas-Slovenja wkoll wara li dan il-pajjiż beda jintuża wkoll bħala rotta mill-immigranti biex jilħqu l-pajjiżi sinjuri tal-Unjoni Ewropea. Dan wara li l-awtoritajiet Sloveni ħadu lura numru ta’ immigranti lejn il-fruntiera Kroata.
Issa l-Ungerija bdiet tibni ħajt tul il-fruntiera mal-Kroazja wkoll, wara li temmet il-bini ta’ wieħed mal-fruntiera Serba, u se tagħmel l-istess tul dik mar-Rumanija.
