Alexis Tsipras ħa l-ġurament tal-ħatra bħala Prim Ministru wara s-suċċess li kiseb fl-elezzjoni ġenerali bikrija tal-Ħadd.
Elezzjoni li sejjaħ wara li kien ilu biss disa’ xhur fil-poter u li fiha kiseb rebħa konvinċenti għalkemm mhux il-maġġoranza assoluta.
Is-Syriza ta’ Tsipras, li rebaħ 35 fil-mija tal-voti – ftit anqas mir-riżultat ta’ Jannar – se jidħol f’koalizzjoni mal-istess partit tal-amministrazzjoni preċedenti, dak tal-Griegi Indipendenti mmexxi minn Panos Kammenos.
Il-Partit tad-Demokrazija ġdida taċ-ċentru xellug rebaħ 28 fil-mija tal-voti filwaqt li ż-Żerniq Dehbi, il-partit estremista tal-lemin, kien konfermat fit-tielet post b’sebgħa fil-mija u rreġistra żieda fil-voti mill-elezzjoni ta’ Jannar.
Il-Kummissjoni Ewropea ħeġġet lil Tsipras biex issa jimxi ’l quddiem bir-riformi li kienu ftiehmu dwarhom.
It-Tlieta, il-Kabinett ġdid ta’ Tsipras jieħu l-ġurament tal-ħatra u l-karigi ewlenin mistennija jibqgħu f’idejn l-istess nies.
Skont is-sistema elettorali Griega, il-partit li jikseb l-akbar ammont ta’ voti jingħata bonus ta’ 50 siġġu u issa s-Syriza se jkollu 145 siġġu f’Parlament ta’ 300 siġġu – erbgħa anqas minn dak li kellu fl-aħħar mandat.
Il-Griegi Indipendenti, partit kontra l-awsterità imma li jaqbel mas-Syriza, rebaħ għaxar siġġijiet, id-Demokrazija Ġdida rebaħ 75 siġġu u ż-Żerniq Dehbi rebaħ 18-il siġġu.
