Hu summit imqanqal dak li ssejjaħ b’urġenża l-erbgħa għall-mexxejja tal-Unjoni Ewropea biex jippruvaw isibu tarf il-kriżi tal-immigrazzjoni.
Summit li sar l-għada ta’ laqgħa tal-Ministri tal-Intern tal-UE li saret it-Tlieta u li fiha kien deċiż li 120,000 refuġjat jitqassmu bejn it-28 pajjiż membru tal-UE. Permezz ta’ dan il-ftehim, Malta se tieħu 189 refuġjat fuq medda ta’ sentejn. Dan biex jittaffa l-piż minn fuq l-Italja u l-Greċja.
Fil-laqgħa, iżda, l-Ungerija, ir-Repubblika Ċeka, ir-Rumanija u s-Slovakkja vvutaw kontra filwaqt li l-Finlandja astjeniet fil-vot li ttieħed. Dan minkejja li l-ftehim hu wieħed li jorbot u dawn il-pajjiżi wkoll iridu josservawh.
Qabel il-bidu tas-summit, Robert Fico, il-Prim Ministru tas-Slovakkja, qal li pajjiżu kien se jipprova jimblokka din id-deċiżjoni fil-qrati filwaqt li Bohuslav Sobotka, il-Prim Ministru tar-Repubblika Ċeka, qal li l-ftehim tat-Tlieta kien deċiżjoni ħażina.
Viktor Orban, il-Prim Ministru Ungeriż, li hu kontra ħafna li jkun hemm kwoti għall-immigranti, ma kienx mistenni jattendi s-summit tal-bieraħ. Iżda qabel, hu qal li ried li l-piż jinġarr mid-dinja kollha u mhux mill-UE biss. Din il-proposta kellu jressaqha waqt is-summit tal-bieraħ. Hu tenna wkoll li l-Greċja trid tingħata għajnuna biex tipproteġi l-fruntieri tagħha biex l-immigranti ma jkomplux jidħlu.
Sadattant, is-Serbja ħarġet ultimatum lill-Kroazja biex terġa’ tiftaħ il-fruntiera għall-ġarr tal-merkanzija sa nofsillejl tal-bieraħ inkella, qalet, kien se jkun hemm il-konsegwenzi.
Il-Kroazja għalqet il-qsim tal-fruntiera kollu ħlief wieħed wara li f’ġimgħa daħlu fil-pajjiż 44,000 immigrant. Dan b’rabja għad-deċiżjoni tas-Serbja li tibda ġġorr l-immigranti lejn il-fruntiera Kroata minflok tibgħathom lejn il-fruntiera Ungeriża fejn issa nbena speċi ta’ ħajt biex iwaqqaf l-immigranti.
Il-pass Kroat li tingħalaq il-fruntiera ta daqqa ta’ ħarta kbira lill-ekonomija Serba peress li ħafna merkanzija diretta lejn is-Serbja tinġarr fuq l-art tul it-toroq Kroati mill-Unjoni Ewropea.
Fi żvilupp ieħor, il-Kummissjoni – qabel is-summit – ħarġet twissijiet formali lil 19-il stat membru, fosthom Malta, dwar ksur tar-regolamenti dwar l-ażil.
Il-Kummissjoni Ewropea qalet li elementi tal-politika tal-ażil mhux qed jiġu implimentati fosthom liġijiet biex jitħaffef il-pass li bih ikun deċiż jingħatax il-kenn umanitarju, liġijiet dwar it-trattament uman ta’ dawk li qed ifittxu kenn u r-regoli għall-għoti ta’ kenn għandhom ikunu aktar ċari.
Timmermans qal li s-sistema għall-għoti tal-kenn fl-Unjoni Ewropea setgħet taħdem jekk kulħadd isegwi r-regoli.
