Il-Membru Parlamentari Ewropew Ingliża Jean Lambert irrikonoxxiet il-ħidma li wettaq il-Kap tal-Oppożizzjoni u tal-Partit Nazzjonalista Simon Busuttil għal soluzzjoni dwar il-kriżi tar-refuġjati. Qal li flimkien mal-MEP f’isem il-Partit Nazzjonalista Roberta Metsola, il-politiċi Maltin għandhom kontribut importanti x’jagħtu f’dawn is-soluzzjonijiet, bil-perspettiva Mediterranja tal-problema.
Lambert kienet waħda mill-kelliema ewlenin f’konferenza li fakkret il-ħames anniversarju mit-twaqqif tal-Uffiċċju Ewropew tal-Ażil (EASO) f’Malta. Għall-konferenza attendew diversi politiċi lokali, fosthom ix-Shadow Minister Claudette Buttigieg, kif ukoll numru ta’ politiċi barranin, MEPs u rappreżentanti ta’ organizzazzjonijiet involuti fis-settur tar-refuġjati u l-immigranti.
Il-konferenza, li saret f’Dar il-Mediterran għall-Konferenzi fil-Belt, trattat l-importanza tas-solidarjetà bejn il-pajjiżi involuti u enfażizzat l-importanza ta’ soluzzjoni kollettiva għal din il-problema.
Ma’ MaltaRightNow.com, id-Deputat Nazzjonalista Carm Mifsud Bonnici, li kien responsabbli mill-ftuħ ta’ dan l-Uffiċċju fl-2011, qal li hu pożittiv li dan l-Uffiċċju importanti issa qed jopera minn Malta għax juri l-impenn u s-solidarjetà li Malta dejjem uriet quddiem il-problema. Mifsud Bonnici sostna li l-Unjoni Ewropea għandha l-istituzzjonijiet meħtieġa biex jiffunzjonaw f’dawn iċ-ċirkostanzi, li jridu jkunu huma li jaħdmu biex jinstabu s-soluzzjonjiet.
