Aktar minn 95 persuna tilfu f’ħajjitom u aktar minn 238 sfaw midruba wara attakk fil-kapitali Torka Ankara. Attakk li l-Prim Ministru Ahmet Davutoglu qal li jidher li hu attakk ta’ bomba suwiċida. Il-gvern Tork iddikjara tlett ijiem ta’ luttu nazzjonali wara dan l-agħar attakk fl-istorja moderna tat-Turkija.
Attakk mdemmi li seħħ waqt protesta favur il-paċi minn attivisti Kurdi u attivisti ta’ partiti xellugin.
Il-gvern Tork saħaq li qiegħed jitratta dan il-każ bħala wieħed ta’ terroriżmu.
Minn naħa tagħhom iżda l-Kurdi qegħdin jippontaw it-tort lejn il-partit AKP li huwa fit-tmexxija tal-pajjiż.
It-Turkija ser tivvota f’elezzjoni ġenerali fl-1 ta’ Novembru li ġej.
