Hekk kif fit-Turkija bdew ikunu osservati tliet ijiem ta’ luttu nazzjonali, is-suspetti ewlenin huma li l-ISIS kienu wara l-istraġi ta’ nhar is-Sibt f’Ankara li ħalla aktar minn 90 persuna mejta.
Attakk suwiċida doppju li seħħ waqt dimostrazzjoni favur il-paċi bejn il-Kurdi u l-Gvern Tork u li hu l-agħar attakk terroristiku li qatt sar fit-Turkija.
Il-Ħadd saru dimostrazzjonijiet ta’ kundanna għal dawn l-attakki u kien hemm inċidenti mal-Pulizija meta xi nies ippruvaw iħallu fjuri mal-post fejn seħħew l-attakki.
Hemm min qed jakkuża l-Gvern li kien wara l-attakki imma l-Pulizija qalet li hemm xebh kbir fil-mod kif saru dawn l-attakki u attakk ieħor li kien sar Suruc f’Lulju u li kien ħalla 30 persuna mejta.
Sadattant la t-Turkija u lanqas ir-Russja ma kkummentaw dwar rapporti li ajruplani militari Torok kienu waqqgħu ajruplan militari Russu minn dawk stazzjonati fis-Sirja. Is-Sibt kien hemm ħafna spekulazzjoni fuq l-internet li twaqqa’ l-ajruplan imma osservaturi qalu li din tidher li kienet biss spekulazzjoni li nbdiet fuq l-internet u ma jirriżultax li xi ajruplani twaqqgħu. F’dawn l-aħħar ġranet it-Turkija ilmentat mar-Russja li ajruplani Russi kienu daħlu fl-ispazju tal-ajru Tork waqt missjonijiet fis-Sirja.
