Il-Kanċillier Ġermaniż Angela Merkel illum wissiet li l-Ewropa ma kellha ebda ċans li tegħleb il-kriżi tal-immigrazzjoni mingħajr kooperazzjoni mat-Turkija u ħeġġet azzjoni konkreta tat-traffikar tan-nies barra mill-kosta tagħha.
Hi qalet dan ftit qabel telqet għal summit tal-Unjoni Ewropea fi Brussell. It-tema ewlenija kienet il-kriżi tal-immigrazzjoni li qabdet lill-UE fuq sieq waħda dan is-sajf.
Hemm stennija li fis-summit tittaffa ftit il-firda li kien hemm bejn il-pajjiżi membri tal-Ewropa Ċentrali u l-bqija tal-membri wara ġimgħat ta’ tilwim dwar it-tqassim tal-piż tal-immigranti fost il-pajjiżi membri kollha.
Sadattant, fi Brussell hemm ukoll il-Kap tal-Oppożizzjoni Simon Busuttil għal summit tal-Partit Popolari Ewropew (PPE) fejn l-isfida tal-immigrazzjoni u temi oħra marbutin magħha se jkunu għad-diskussjoni. Fost oħrajn, qed jattendu għal din il-laqgħa l-President tal-Kummissjoni Ewropea Jean Claude Juncker, il-President tal-Kunsill Ewropew Donald Tusk, kif ukoll Merkel u l-Prim Ministru Spanjol Mariano Rajoy.
