Mill-inqas 22 immigrant, ħafna minnhom tfal, għerqu waqt vjaġġ bil-baħar mit-Turkija meta kienu qed jippruvaw jaslu fil-gżejjer Griegi ta’ Rodi u Kalymnos.
Din kienet it-tieni traġedja f’ġimgħa li tinvolvi lill-immigranti, meta, fl-aħħar xhur, l-influss ewlieni ta’ immigranti kien dirett lejn il-gżejjer Griegi magħrufa bħala resorts turistiċi u li jinsabu ftit lil hinn mill-kosta tat-Turkija fil-Baħar Eġew.
L-uffiċjali Griegi li kkummentaw dwar l-aħħar traġedja qalu li mietu 19 waqt li salvaw 138 persuna, fil-limiti ta’ Kalymnos. Sadanittant, mietu tliet immigranti oħra ftit ’il barra minn Rodi, u l-iskwadri għall-emerġenza salvaw sitta minn din iz-zona.
Fi żviluppi oħra, l-iskwadri tas-salvataġġ fin-Nofsinhar ta’ Spanja kienu qed ifittxu għal għexieren ta’ immigranti li ma dehrux aktar wara li d-dgħajsa tagħhom inqerdet waqt vjaġġ mill-Marokk lejn l-Ewropa. F’dan il-każ salvaw 15-il immigrant, u l-awtoritajiet irkupraw tal-anqas erba’ katavri mill-baħar.
