Il-linja tal-ajru Russa Kogalymavia qalet li t-tiġrif tal-ajruplan, nhar is-Sibt, fl-inħawi tas-Sinai fl-Eġittu kien dovut għal ‘influwenza esterna’. Dan waqt li kelliem ewlieni sostna li din hi l-unika spjegazzjoni li tista’ tagħmel sens fil-preżent.
L-investigazzjoni mill-esperti tal-avjazzjoni li qed jibbażaw fuq it-tagħrif mill-kaxxi s-suwed tal-ajruplan kienet għadha ma pproduċietx konklużjoni. Intant, kelliema għall-Gvern tar-Russja komplew iwissu kontra spekulazzjonijiet dwar it-tiġrif tal-Airbus 321, waqt vjaġġ bejn Sharm el-Sheikh u San Pietruburgu u li fih mietu 224 persuna.
Il-President tar-Russja Vladimir Putin fisser it-tiġrif tal-ajruplan bħala traġedja kbira u wassal il-kondoljanzi lill-qraba tal-vittmi. Hu qal li se jsir minn kollox biex tingħata idea kredibbli ta’ x’wassal għat-tiġrif biex ikunu jafu x’seħħ u tittieħed reazzjoni xierqa. Fl-istess ħin, l-awtoritajiet Russi mhuma jeskludu xejn, għalkemm l-investigazzjoni għadha fil-bidu.
Alexander Smirnov, il-Viċi Direttur tal-linja Kogalymavia (magħrufa wkoll bħala Metrojet), tkellem waqt konferenza f’Moska u ċaħad il-possibbiltà ta’ ‘difetti tekniċi’ jew ‘żball tal-pilota’ bħala fatturi potenzjali wara t-tiġrif tal-ajruplan ta’ din il-linja.
“L-unika spjegazzjoni għad-diżintegrazzjoni tal-ajruplan fl-ajru għandha tkun waħda li tibbaża fuq impatt speċifiku dovut totalment għal aspett mekkaniku u fiżiku,” sostna Smirnov. Il-Viċi Direttur kompla li ma jeżistux ċirkostanzi fejn il-fallimenti ta’ sistemi f’daqqa jikkombinaw biex iwasslu għall-qerda tal-ajruplan fl-ajru.
Uffiċjal ieħor tal-linja tal-ajru, imbagħad, ammetta li l-parti ta’ wara tal-ajruplan inkwistjoni kien ġarrbet xi ħsarat waqt it-tlugħ, fl-2001. Iżda l-uffiċjal għamilha ċara wkoll li kienu saru t-tiswijiet neċessarji u li ma jaħsbux li l-ħsarat kienu parti mit-traġedja.
