Għada wara nofsinhar se tibda r-raba’ kompettizjoni, dik tal-BOV Knockout fejn fl-ewwel konfront Hibs jilagħbu kontra Pavi Depiro filwaqt li fit-tieni logħba Bupa Luxol ikunu fl-azzjoni kontra Floriana Cafe Del Mar. Illum jingħata bidu għall-Kampjonat tan-nisa.
Depiro u Hibs jippruvaw jiksbu post fis-semi-finali tal-BOV Knockout. Iż-żewġ timijiet ma kellhomx bidu tajjeb dan l-istaġun u qed isibuha diffiċli biex jiksbu rebħa.
Depiro jittamaw li jirkupraw lil T. Zammit biex ikunu aktar effettivi fl-attakk. Iż-żewġ timijiet jibbażaw il-logħob tagħhom fuq plejers żagħżagħ u din in-nuqqas ta’ esperjenza qed taffettwa l-logħob tagħhom.
Floriana se jkunu qed jipprovaw jirritornaw għar-rebħ meta jilagħbu kontra Luxol li minn naħa tagħhom jistgħu joffru sfida tajba. Ta min jiftakar li Floriana se jkunu ġejjin minn telfa fil-finali tas-St James Hospital Shield, telfa li sofrew lejn l-aħħar wara li kienu minn fuq għal ħinijiet twal. Luxol tlfu lit-twil S. Capello li mar jaħdem barra minn Malta.
L-ewwel logħba mill-kampjonat tan-nisa se tara lit-tim ġdid ta’ Floriana jilgħab kontra l-qawwa ta’ Caffe Moak Luxol li għaddejjien minn perijodu tajjeb u rebħu l-aħħar żewġ unuri, is-Super Cup u x-Shield.
Depiro, wara d-diżappunt fil-finali tax-Shield m’għandhomx ifallu kontra t-tim żagħżugħ ta’ Starlities filwaqt li l-aħħar logħba, dik bejn Gżira Athleta u Hibs għanda tkun aktar bilanċjata għalkemm Hibs huma xi ftit favoriti.
