Immigranti Marokkini, Iranjani u Pakistani li spiċċaw fil-fruntiera tal-Greċja mal-Maċedonja waqqfu t-traffiku tal-ferroviji u insistew li jivvjaġġaw lejn il-Punent tal-Ewropa. Dan meta l-immigranti huma mxekkla minn politika li qed tkun implimentata fir-reġjun tal-Balkani u li qajmet tħassib dwar id-drittijiet umani.
Mijiet ta’ eluf ta’ immigranti, ħafna minnhom Sirjani li qed jaħarbu mill-gwerra, qegħdin jivvjaġġaw mill-peniżola tal-Balkani wara li qasmu permezz tal-baħar mit-Turkija għall-Greċja. Huma jridu jaslu fil-pajjiżi Ewropej tat-Tramuntana u l-Punent, fosthom il-Ġermanja u l-Iżvezja.
Madankollu, is-Slovenja qalet li tipprovdi aċċess biss lir-refuġjati li qed jaħarbu mill-konflitt fis-Sirja, l-Iraq u l-Afganistan u li se jintbagħtu lura dawk kollha kkunsidrati bħala ‘immigranti ekonomiċi’. Il-Kroazja, is-Serbja u l-Maċedonja adottaw l-istess politika u llum ammonti kbar ta’ immigranti spiċċaw iżolati fit-tined qalb il-fruntieri tal-Balkani, issa li x-xitwa qiegħda fil-qrib.
