L-awtoritajiet fil-Belġju arrestaw u akkużaw żewġ irġiel oħra b’konnessjoni mal-attakki tat-13 ta’ Novembru mit-terroristi tal-ISIS f’Pariġi li kienu ħallew 130 maqtula u għexieren ta’ midruba.
L-aħħar rapporti qalu li wieħed mis-suspettati kien arrestat nhar il-Ħadd f’ajruport ta’ Brussell fejn kien qed jipprova jaqbad ajruplan lejn il-Marokk.
It-tieni suspettat spiċċa arrestat fl-istess jum meta kien fiz-zona ta’ Molenbeek ta’ Brussell. L-aħħar akkużi jtellgħu għal tmienja l-ammont tas-suspettati fil-Belġju li qed jiffaċċjaw akkużi speċifiċi b’konnessjoni ma’ azzjonijiet terroristiċi.
Ir-raġel li kien qed iħejji biex jaqbad l-ajruplan issemma bħala ‘parti mill-grupp’ ta’ Bilal Hadfi – it-terrorista li, fit-13 ta’ Novembru, tajjar lilu nnifsu fi triq wara li ma rnexxilux jidħol fis-Stade de France fejn kienet għaddejja l-logħba ta’ ħbiberija internazzjonali bejn Franza u l-Ġermanja.
