Il-Pentagon tal-Istati Uniti kkonferma li wieħed mill-ogħla kmandanti tal-ISIS kien spiċċa maqtul waqt attakk li l-qawwiet tal-ajru Amerikani kienu wettqu, ix-xahar li għadda, fuq il-belt Libjana ta’ Darnah.
Is-Segretarju għall-Istampa tal-Pentagon, Peter Cook, sostna li l-azzjoni li qatlet lil Abu Nabil, ta’ nisel Iraqi, imxiet mal-pjan li kien tfassal qabel l-ISIS, fit-13 ta’ Novembru, wettaq is-sensiela ta’ attakki terroristiċi li ħallew għexieren ta’ mejtin u midruba f’Pariġi, il-kapitali ta’ Franza.
Jaħsbu li Nabil għamel żmien bħala Gvernatur tal-provinċja ta’ Salah-ad-din, fl-Iraq, qabel kien ittrasferit lejn il-Libja biex imexxi l-fergħa tal-ISIS f’dak il-pajjiż.
Kien hemm ukoll spekulazzjoni li Abu Nadil deher bi priorità fuq filmat ta’ propaganda tal-ISIS fejn hu jinstama’ jhedded lill-Punent. F’dan il-filmat partikolari kienet dehret l-esekuzzjoni ta’ 21 Kristjani Kopti taħt idejn it-terroristi tal-ISIS u li seħħet fuq bajja tal-Libja.
Sadanittant, l-awtoritajiet Amerikani qalu li l-qtil ta’ Nabil għandu jnaqqas il-kapaċità tal-ISIS biex jilħaq l-iskopijiet tiegħu fil-Libja, li jinkludu impenji għar-reklutaġġ ta’ terroristi ġodda.
