Ir-rappreżentanti tal-pajjiżi involuti fis-summit ta’ Pariġi, magħruf bħala COP21, qegħdin jaħsbu biex jikkonkludu ftehim globali li jikkontrolla l-bidliet fil-klima. Huma qed jittamaw li jilħqu t-tragward għada, ġurnata aktar tard milli mistenni.
Il-Ministru Franċiż għall-Affarijiet Barranin Laurent Fabius, li hu ċ-chairman tas-summit, qal li l-affarijiet mexjin fid-direzzjoni t-tajba, iżda l-analisti sostnew li jinħtieġ aktar kompromess bejn il-pajjiżi jekk għandu jintlaħaq ftehim konkret. F’każ li n-negozjaturi jaslu biex jiffirmaw ftehim dwar il-klima f’Pariġi, dan għandu jidħol fis-seħħ fl-2020.
Sadanittant, Fabius qal li l-aħħar żviluppi qegħdin jidhru pożittivi waqt li tkellem b’ottimiżmu fis-sens li ftehim ġdid ta’ kompromess dwar il-klima se jkun ippreżentat fis-sigħat li ġejjin.
Dan wara li l-parteċipanti għal COP21 ilhom minn nofs il-ġimgħa jaħdmu fuq abbozz ta’ kliem ġdid għall-ftehim li ħejjiet il-Presidenza Franċiża. L-analisti, min-naħa tagħhom, mhumiex sorpriżi bid-dewmien fit-taħditiet dwar il-klima minħabba l-ħtieġa għall-konsensus u l-fatt li jinħtieġu aktar negozjati sakemm it-tragward jintlaħaq.
Is-Segretarju Ġenerali tan-Nazzjonijiet Uniti, Ban Ki-moon, qal li n-negozjati waqt is-summit ta’ Pariġi huma l-aktar ikkumplikati iżda, fl-istess ħin, l-aktar importanti għall-umanità.
Filwaqt li għad fadal numru ta’ kwistjonijiet, l-analisti kienu qed jistennew din is-sitwazzjoni peress li r-rappreżentanti tal-pajjiżi qed jippruvaw jilħqu ftehim li jwassal ukoll għal bidliet fit-tul għall-ekonomija globali.
