Dan l-aħħar, fil-padiljun tal-Università, tkompla l-kampjonat tal-ewwel diviżjoni. Fil-partita tal-ġimgħa mill-kampjonat Luxol komplew isaħħu posthom fil-klassifika wara li għelbu lil La Salle Unique 23-17.
Luxol ħadu daqqa ta’ ħarta lejn l-aħħar tal-ewwel taqsima meta l-Ungeriż David Kocsis intwera l-karta l-ħamra mill-uffiċjali tal-logħba. L-ewwel taqsima spiċċat 12-11 favur Luxol.
Fil-bidu tat-tieni taqsima La Salle għamlu reazzjoni u marru fil-vantaġġ. Madankollu xejn ma qata’ qalb Luxol li baqgħu jissieltu sal-aħħar. La Salle wkoll spiċċaw b’Ian Turban imkeċċi u Luxol irnexxielhom jerġgħu jmorru filvantaġġ u jikkontrollaw il-logħba.
Il-plejer Spanjol ta’ Luxol, Sergio Munoz Del Olmo, awtur ta’ 8 gowls, ġie vvutat bħala l-aħjar plejer tal-logħba. Iż-żewġ uffiċjali tal-logħba kienu Stefan Desira u Thomas Degiorgio. B’din ir-rebħa Luxol baqgħu f’ras il-klassifika. It-tieni logħba rat lil Aloysians Von Taine u Swieqi Gasan Mamo Phoenix, b’tal-ewwel joħorġu rebbieħa u jiksbu t-3 punti. Aloysians kellhom lil Jerome Zammit f’forma brillanti hekk kif skorja xejn anqas minn 6 gowls. Mill-bidu tal-logħba, Aloysians marru fuq quddiem u bil-mod il-mod ikkontrollaw il-logħba u kabbru d-distakk biex daħlu jistrieħu b’4 gowls vantaġġ.
Fil-bidu tat-tieni taqsima ż-żewġ timijiet taw botta u risposta lil xulxin. Minkejja dan, aktar ma beda jgħaddi l-ħin, Aloysians aktar bdew isiru veloċi u letali fl-attakki tagħhom. Clinton Mifsud kien l-aħjar plejer tal-logħba filwaqt li Jerome Zammit kien l-aħjar plejer għall-Aloysians.
Kavallieri RS2 kisbu 3 punti oħra meta għelbu lill-HMS Parthenope. HMS ħarġu b’saħħithom u fetħu l-iskor b’gowls ta’ Nicholas Fava. Kavallieri rrispondew tajjeb b’gowls ta’ Chris McClean u Mateus Gonzales. B’pass sostnut it-tim ta’ Kavallieri, immexxi minn Anthony Xuereb, ikkontrollaw l-avversarji u daħlu għall-mistrieħ b’5 gowls vantaġġ.
Fit-tieni taqsima HMS ippruvaw jagħmlu reazzjoni iżda għal ħinijiet twal kienu Kavallieri li ssuperaw u tal-aħħar ħarġu rebbieħa b’29-10. Chris McClean ta’ Kavallieri, ġie vvutat l-aħjar plejer tal-logħba filwaqt li Andrew Tabone kien l-aħjar plejer għal HMS.
