Il-Pulizija fi Franza arrestaw raġel bħala parti mill-investigazzjoni dwar l-attakki tat-13 ta’ Novembru mill-ISIS fil-qalba ta’ Pariġi, li rriżultaw f’130 maqtula.
L-arrestat, ta’ 29 sena, spiċċa miżmum fir-reġjun tal-kapitali u mifhum li kellu pjan biex imur is-Sirja.
Intant, il-Pulizija Franċiża arrestat ukoll lil żewġ persuni fuq suspett li huma pprovdew l-armi lil terrorista li, xhur ilu, kien wettaq attakk ieħor f’Pariġi. L-arresti saru fit-Tramuntana ta’ Franza u l-persuni inkwistjoni kienu qed jgħinu l-istħarriġ tal-pulizija.
Iż-żewġ persuni – fosthom raġel b’rabtiet mal-estremisti tal-lemin – huma suspettati li appoġġjaw lil Amedy Coulibali, it-terrorista li, f’Jannar, kien attakka supermarket ta’ Pariġi li jbigħ l-ikel tal-Lhud. Coulibali kien spiċċa maqtul mill-qawwiet tas-sigurtà li assedjaw is-supermarket biex jeħilsu numru ta’ ostaġġi miżmuma minnu.
Sadanittant, Sven Lau, predikatur Iżlamiku prominenti, spiċċa arrestat f’Moenchengladbach, fil-Ġermanja, fuq suspett li qed jappoġġja grupp konness mal-ISIS. Lau hu anki suspettat li qed jirrekluta ġellieda għal ma’ dan il-grupp.
