Raġel qed jissogra piena ta’ 40 sena ħabs wara li kiteb kliem sarkastiku dwar Tongdaeng, il-kelb tar-Re Bhumibol Adulyadej tat-Tajlandja (ritratt).
Ir-raġel, Thanakorn Siripaiboon, kien arrestat il-ġimgħa li għaddiet u apparti li kien akkużat li b’dak li kiteb kien insulta lir-Re tat-Tajlandja, reat serju fil-pajjiż, kien akkużat ukoll b’tixwix.
Il-militar Tajlandiż, li s-sena li għaddiet ħataf il-poter f’kolp ta’ stat, ma speċifikax eżattament x’kiteb Siripaiboon dwar il-kelb. Min-naħa l-oħra hemm ħafna fit-Tajlandja li jammiraw lill-kelb u jħeġġu lin-nies jobdu u juru lealtà lejn ir-Re bħalma jagħmel il-kelb tiegħu. Bħalissa t-tieni film l-aktar popolari fis-swali taċ-ċinema tat-Tajlandja hu proprju wieħed dwar Tongdaeng u hu bbażat fuq ktieb li kien kiteb l-istess Re dwar il-kelb tiegħu fl-2002.
F’Diċembru, żewġ studenti tressqu l-qorti wara li kitbu reċta li fiha kien hemm karattru ta’ re fittizju.
