Illum wara nofsinhar jitkompla l-kampjonat BOV fejn Hibs imisshom kontra Bupa Luxol. Għada l-ewwel fl-azzjoni jkunu Floriana Cafe Del Mar kontra Pavi Depiro u l-aħħar logħba qabel il-waqfa għall-festi tkun dik bejn Falken Cynergi Virtus u Gżira Athleta. Se jintlagħbu wkoll is-semi finali tan-Knockout tan-nisa fejn Hibs Electrofix jilagħbu kontra Pavi Depiro u Caffe Moak Luxol jkunu fl-azzjoni kontra Gżira Athleta.
Hibs u Luxol jiltaqgħu biex iżommu l-pass mal-ewwel timijiet biex jiksbu post fil-play-offs. Iż-żewġ timijiet m’humiex konsistenti fil-logħba tagħhom. Hibs, wara r-rebħa fuq Gżira fit-Tazza Louis Borg jinsabu b’moral għoli waqt li Luxol qed ibatu mill-burdati taż-żagħżagħ. Il-problema ta’ Luxol hi li CJ. Cordina u l-Amerikan C. Fanson ikunu wisq individwali anki meta ma tantx ikunu preċiżi fix-xuttijiet tagħhom.
Floriana wara d-diżappunt kontra Virtus fis-semi-finali tan-K.O. m’għandhomx ifallu milli jiksbu ż-żewġ punti kontra Depiro li hu tim wisq nkonsistenti. Il-plejers ta’ Depiro fil-maġġoranza huma żagħżagħ biss jekk l-Amerikan M. Neulue jkun immarkat tajjeb dawn ibatu. Floriana mhux suppost iħossu n-nuqqas tax-xutter N. Vasovic. Floriana, bi plajers bħal C. Patus, N. Sultana u A. Axiaq mistennija jirbħu d-dwell taħt il-boards.
Gżira jipprovaw iwaqqfu l-mixja ta’ Virtus u jagħtuhom l-ewwel telfa. Gżira, wara d-disfatta kontra Hibs għamlu reazzjoni kontra Depiro. L-Olandiż D. Wiersum, flimkien mal-captain M. Naudi qed ikunu pedini importanti fil-logħob ta’ Gżira.
Gżira, wara li irkupraw lil R. Vella li kien imweġġa’ jisperaw anki f’N. Lubrano. Virtus x’aktarx se jkollhom lil Malti Awstraljan J. Formosa mweġġa’ biss għandhom materjal tajjeb biex ikomplu għaddejjin jekk jilagħbu bħala tim.
Fis-St James Hospital K.O. tan-nisa Hibs jippruvaw jiskbu post fil-finali għas-spejjeż ta’ Depiro li ma tantx għadejjin minn mument feliċi. Iktar bilanċjata għandha tkun is-semi-finali l-oħra bejn Luxol u Gżira.
