Diplomatiċi Maltin jinsabu urtati wara li waqt il-Valletta Summit u l-laqgħa tal-Kapijiet tal-Pajjiżi tal-Commonwealth (CHOGM) ma ngħataw l-ebda funzjoni partikolari, anzi kienu skartati.
Membri tal-Korp Diplomatiku li tkellmu mal-gazzetta in-Nazzjon tal-lum fissru li jekk dawn iż-żewġ avvenimenti kbar ġew u marru, għalihom dawn kienu jfissru xhur sħaħ ta’ preparamenti fuq dossiers u fuq materjal ieħor konness maż-żewġ laqgħat.
Is-sorsi qalu li fi x’ħin wasal iż-żmien iż-żewġ laqgħat diplomatiċi fi ħdan il-Ministeru tal-Affarjiet Barranin irċivew sorpriża fil-forma ta’ ċirkulari u li permezz tagħha kull min xtaq li jipparteċipa fil-laqgħat tas-Summit dwar l-Immigrazzjoni u fiċ-CHOGM kellu jimla’ applikazzjoni u wara proċess ta’ għażla, jekk jintagħżel, jingħata pakkett ta’ mitt ewro taxxabbli.
L-istess sorsi qalu li din kienet l-akbar offiża speċjalment għal dawk li għal xhur sħaħ ħadmu bla heda fuq il-preparamenti taż-żewġ avvenimenti. Is-sorsi li tkellmu magħna komplew jgħidulna li huma l-bosta diplomatiċi fil-Gvern li baqgħu jsaħħnu s-siġġijiet u jingħataw xogħol mhux relatat max-xogħol propju tagħhom. Huma qalu li dan qed issir b’detriment għall-pajjiż u biex jaġevola xi nies mill-Partit Laburista.
Huma staqsew x’se jiġri issa li Malta se tħaddan il-Presidenza tal-Unjoni Ewropeja u temmew jistaqsu jekk hux se jerġa jiġri l-istess u jerġgħu jkunu ripetuti dawn l-affarjiet li seħħew matul ix-xahar li għadda ta’ Novembru.
