Il-Pulizija fil-Belġju arrestaw id-disa’ suspettat b’konnessjoni mal-attakki terroristiċi tat-13 ta’ Novembru li wettqu l-militanti tal-ISIS fil-qalba ta’ Pariġi u li swew il-ħajja ta’ 130 persuna.
Il-Prosekuturi qalu li l-arrestat, magħruf bħala ‘Abdullah C’, kien ikkuntattjat mill-kuġina ta’ Abdelhamid Abaaoud, li spiċċa maqtul minn qawwiet tas-sigurtà, u li mifhum li kien il-kap tat-terroristi li wettqu d-dmija storika f’Pariġi.
Abaaoud, ċittadin Belġjan, u kuġintu, Hasna Aitboulahcen, kienu nqatlu proprju ħamest ijiem wara li wettqu l-attakki f’Pariġi u meta l-pulizija assedjaw appartament, qrib il-kapitali Franċiża, li t-terrorista u kuġintu kienu qed jużaw bħala refuġju.
Ftit huma d-dettalji dwar l-allegat rwol ta’ ‘Abdullah C’ fl-attakki tat-13 ta’ Novembru. Ingħad biss li s-suspettat spiċċa arrestat mill-pulizija fi Brussell, nhar it-Tlieta. Il-Pulizija ma ħabbritx mal-ewwel l-arrest bl-iskop li ma tiġbidx l-attenzjoni ta’ kompliċi oħrajn potenzjali.
L-istampa Belġjana, intant, qalet li ‘Abdullah C’ tressaq quddiem qorti fi Brussell, u li l-każ tiegħu spiċċa pospost għal data oħra.
