L-Ayatollah Ali Khamenei, il-mexxej suprem Iranjan, wissa li l-Arabja Sawdija se tħabbat wiċċha ma’ “tpattija divina” minħabba l-eżekuzzjoni ta’ mexxej reliġjuż prominenti Xiita.
Dan wara li x-Sheikh Nimr al-Nimr kien fost 47 persuna li ngħataw il-piena tal-mewt fl-Arabja Sawdija fi tmiem il-ġimgħa li għaddiet. Nimr kien mexxa protesti kontra t-tmexxija rjali fl-Arbaja Sawdija u kien meqjum ħafna fl-Iran, pajjiż Xiita, filwaqt li l-Arabja Sawdija hu pajjiż Sunnita Musulman.
Tard is-Sibt filgħaxija folla ħebbet għall-Ambaxxata Sawdita f’Tehran u parti mill-bini ngħata n-nar.
Uffiċjalment, dawk li ngħataw il-piena tal-mewt kienu akkużati b’terroriżmu. Iżda Khamenei qal li Nimr la kien imdaħħal f’movimenti armati u lanqas f’xi konfoffi. L-unika ħaġa, qal Khamenei, kien li Nimr kien kritiku ħafna tat-tmexxija fl-Arabja Sawdija.
Nimr kien mexxej ewlieni tal-protesti li kienu splodew fl-Arabja Sawdija wara r-Rebbiegħa Għarbija qabel ma kien arrestat fl-2012.
Il-protesti kontra l-qtil fl-Arabja Sawdija nfirxu fost diversi komunitajiet tal-Musulmani Xiiti madwar id-dinja.
