Il-Gvern Żvediż introduċa mill-ġdid kontrolli tad-dokumenti ta’ kull min ikun se jidħol fil-pajjiż mid-Danimarka. Dan fi sforz li jrazzan in-numru ta’ immigranti li qed jidħlu fil-pajjiż
Tul l-2015 kienu madwar 160,000 persuna li talbu kenn fl-Iżvezja. Din hi l-ewwel darba mis-snin Ħamsin li l-Iżvezja qed tagħmel kontrolli tul il-fruntiera mad-Danimarka.
Dawk kollha li jridu jaqsmu l-Pont ta’ Oresund, li jgħaqqad l-Iżvezja mad-Danimarka, se jkollhom bżonn dokumenti meħtieġa biex ikunu jistgħu jidħlu fil-pajjiż. Jekk le mhux se jitħallew. Dawk li jkunu qed jidħlu bil-ferrovija, se jkollhom jbiddlu l-ferrovija fl-Ajruport ta’ Kopenhagen fid-Danimarka u wkoll jippreżentaw karti ta’ identifikazzjoni.
Fid-diskors tiegħu tal-Ewwel tas-Sena, il-Prim Ministru Daniż Lars Løkke Rasmussen qal li l-pajjiż kien lest jimponi kontrolli simili tul il-fruntiera mal-Ġermanja jekk il-kontrolli li introduċiet l-Iżvezja jwasslu biex ammont kbir ta’ immigranti jispiċċaw imblukkati fid-Danimarka.
