HIBS………………………………………2
PSV…………………………………………1
Referee: Marco Borg Skurjaw: R. Vloet 9 (PSV), J. P. Farrugia 63, J. Santos Silva 90 (H)
F’logħba ta’ ħbiberija ta’ prestiġju, iċ-champions Maltin Hibs kisbu rebħa storika meta għelbu lil PSV Eindhoven bl-iskor ta’ 2-1.
Ta min jiftakar li PSV huma tim li f’Diċembru li għadda għaddew għall-fażi tal-aħħar 16 taċ-Champions League.Barra minn hekk PSV huma champions tal-Olanda u attwalment jinsabu fit-tieni post tal-istess Kampjonat bi 38 punt.
Kienu Hibernins li ħolqu l-ewwel azzjoni perikoluża wara biss ħames minuti meta xutt fil-baxx ta’ Joseph Essien Mbong ġie milqugħ mill-gowlkiper ta’ PSV, Remko Pasveer. Żewg minuti wara xutt minn barra l-kaxxa ta’ Bjorn Kristensen għadda għoli.
Fid-disa’ minuta, PSV fetħu l-iskor meta d-difensur Rui Da Gracia Gomes għadda ballun lura lejn il-gowlkiper Rudy Briffa, iżda l-pass tiegħu kien qasir u RAI VLOET pront apprfoitta u skurja l-gowl tal-vantaġġ.
Fid-19 -il minuta, tentattiv minn xutt angulat u sabiħ tal-midfielder Clayton Failla, deher li seta’ jaqbad lill-goalkeeper Olandiż ta’ PSV, Remko Pasveer, barra minn postu iżda dan kien attent u dawwar il-ballun f’corner.
Il-Pawlisti komplew fuq l-offensiva u fis-27 minuta, xutt minn barra l-kaxxa ta’ Bjorn Kristensen kien salvat minn Remko Pasveer.
Fil-45 minuta, PSV marru viċin irduppjaw l-iskor meta Lestienne għadda cross fil-baxx mix-xellug lejn Narsingh li iżda kien ferm sfortunat meta ra x-xutt tiegħu jistampa mal-mimduda.
Fit-63 minuta Hibernians ġabu d-draw meta Jackson Lima għadda cross meqjus lejn JEAN PAUL FARRUGIA li tefa’ l-ballun f’lasta vojta.
Proprju fid-90 minuta Hibernians skorjaw il-goal tar-rebħa li ta rebħa storika lill-Pawlisti meta s-sostitut Brażiljan JORGE SANTOS SILVA avvanza tajjeb qabel xeħet il-ballun fir-rokna tax-xibka.
Intant, dan il-ġurnal hu nfurmat li l-gowlkiper Olandiż Stan van Hoeven li lagħab parti mill-partita ma’ Hibs hu ferm viċin li jingħaqad mal-Pawlisti. Van Hoeven li riċentament kien qed jilgħab fl-Awstrija ma’ FC Pinzgau, jaħdem ukoll mal-kumpanija SLFC li ġabet lil PSV f’pajjiżna.
Minħabba din ir-relazzjoni li inbniet bejn Hibernians u din il-kumpanija, u minħabba li fl-Awstrija bħalissa hi x-Xitwa u l-kampjonat hu wieqaf, il-goalkeeper ingħata l-opportunita’ li jitħarreġ ma’ Hibs.
Iżda minn sempliċiment taħriġ, issa jidher li hemm possibilta’ li jingħaqad mal-klabb wara li fl-aħħar jiem ħalla impressjoni tajba. Iktar minn hekk, il-plejer saħansitra nsista mal-midja internazzjonali li Hibernians diġa’ offrewlu kuntratt.
