Pembroke Athleta ħabbru li akkwistaw b’self sa tmiem l-istaġun lill-midfielder ta’ 21 sena Terence Agius.
Agius hu plejer ta’ Balzan F.C. li akkwistawh mingħand Pieta’ Hotspurs fil-bidu tal-istaġun. Madankollu ftit li xejn sab spazju u naqas milli jilgħab regolari. Minkejja l-eta’ żgħira tiegħu, Agius diġa’ lagħab 40 logħba fil-Kampjonat Premier.
TARXIEN – Tarxien Rainbows laħqu ftehim konsenswali biex żewġ plejers Brażiljani, l-attakkant ta’ 32 sena Danilo Meira Santos u l-attakkant ta’ 29 sena Anderson Raimundo da Silva jinħallu mill-kuntratt. Dawn it-tnejn kienu fost numru ta’ plejers oħra li ngħaqdu mal-klabb fil-bidu ta’ dan l-istaġun.
ĦAMRUN – Fi stqarrija Ħamrun Spartans ħabbru lil Paul Galea bħala t-Team Manager ġdid tal-klabb. Dan ifisser ritorn għal Galea, li fil-passat kien attiv ferm ma’ Ħamrun. Paul Galea se jieħu post Kenneth Cefai, li fil-ġimgħat li għaddew irriżenja mill-kariga u inħatar Segretarju Ġenerali tal- Futsal Malta Association.
SAN ĠWANN – L-eks kowċ ta’ Naxxar Lions Stefano Grima iffirma kuntratt mal-klabb tal-Ewwel Diviżjoni San Ġwann FC. Illum hu mistenni jmexxi l-ewwel sessjoni ta’ taħriġ.Il-ħatra ta’ Grima tasal ftit jiem wara li l-klabb neħħa lill-kowċ Edmond Lufi.
MOSTA – Il-midfielder ta’ 30 sena Ryan Grech m’għadux iktar plejer ta’ Mosta wara li akkwista r-release mingħand l-istess klabb, li miegħu kien ilu sa mill-2012. Il-plejer diġa’ qed jitkellem ma’ xi klabbs u trasferiment għal klabb ieħor fil-Premier jista’ jkun imminenti. Intant, fil-jiem li ġejjien mistennija jaslu xejn inqas minn ħames plejers Niġerjani bi prova ma’ Mosta.
HIBS – L-attakkant Tarabai bħalissa jinsab fil-Brażil u minn informazzjoni li għandu dan il-ġurnal jidher li qed tonqos il-probabiltá li Tarabai dan l-istaġun jilgħab ma’ Hibernians. Jekk il-klabb Korejan, Seoul E-Land FC iħallas is-somma dovuta l-plejer ikun trasferit għal kollox ma’ dan il-klabb barrani. Minbarra Tarabai, plejer Brażiljan ieħor li jista’ jħalli lil Hibs matul dan ix-xahar hu Denni Rocha Dos Santos li maċ-champions Maltin ftit li xejn qed ikollu spazju.
