Pulizija f’għassa f’Pariġi fetħu n-nar wara li persuna ppruvat tidħol fil-bini armata b’sikkina fost għajjat ta’ “Allah hu l-Akbar” u skont l-ewwel rapporti seta’ kien liebes ċinturin bl-isplussiv biex jissplodi liliu nnifsu.
L-azzjoni seħħet fl-ewwel anniversarju mill-attakki terroristiċi fuq l-uffiċini tal-ġurnal satiriku Charlie Hebdo, fil-kapitali. Minuti qabel, il-President ta’ Franza, Francois Hollande kien faħħar il-Pulizija waqt diskors li fakkar il-vjolenza qattiela ta’ sena ilu.
F’Jannar li għadda, terroristi armati spiċċaw joqtlu 17-il persuna f’sensiela ta’ azzjonijiet li, minbarra l-massakru tal-karikaturisti ta’ Charlie Hebdo, kienu jinkludu attakk fuq supermarket li jbigħ l-ikel għal-Lhud. Kien hemm ukoll tliet pulizija fost il-vittmi, bil-belt ta’ Pariġi tispiċċa maħkuma bit-tensjoni bejn is-7 u d-9 ta’ Jannar tal-2015.
Wara li Hollande, il-Ħamis fakkar dan l-anniversarju iswed waqt id-diskors, fil-kwartieri-ġenerali tal-Pulizija, ħarġet l-aħbar dwar ‘l-isparatura’ fid-distrett tal-kapitali. L-uffiċjali, intant, irreferew għal raġel li kien armat b’sikkina, fost rapporti li r-raġel kien anki liebes ‘qmis tat-tip li jużaw l-aggressuri suwiċida’ u li wara nstab li kien finta.
Hu mifhum li r-raġel beda jgħajjat ‘Allah hu l-akbar’ barra l-għassa tal-Pulizija qrib ta’ Montmartre, u li l-pulizija fetħu n-nar fuqu u qatluh.
Dan ir-raġel kien qed ixejjer sikkina ftit qabel inqatel u l-esperti tal-isplussivi waslu fuq il-post minħabba li l-uffiċjali lemħu numru ta’ wires ħerġin minn ġisem l-aggressur.
Il-qawwiet tas-sigurtà użaw anki robot speċjalizzat għal dawn it-tipi ta’ investigazzjonijiet, u li ma indika l-ebda splussivi fuq il-persuna tar-raġel.
