Ilejla fid-9pm fuq Net Television, jirritorna l-programm Replay Preview fuq Net Television wara waqfa ta’ ġimgħatejn minħabba l-festi tal-Milied u tal-Ewwel tas-Sena. Dan il-programm b’kunċett ġdid, li mall-ewwel kiseb popolarità kbira fost id-dilettanti tal-futbol lokali għaliex hu programm b’still ta’ produzzjoni differenti mill-bqija tal-programmi sportivi l-oħra li jixxandru fuq it-televiżjoni lokali, jifforma parti mill-familja tal-programmi Replay li jixxandru fuq Net Television u Radio 101.
Fil-programm tal-lejla se jkun hemm preview għall-partiti kollha ta’ tmiem il-ġimgħa hekk kif il-Kampjonat Premier jerġa’ jissokta u l-partita tal-ġimgħa se tkun dik bejn Floriana u Tarxien Rainbows. Din il-partita se tintlgħab nhar il-Ħadd li ġej fl-4pm fil-Hibernians Stadium. Qabel din il-partita t-tim ta’ Replay tkellem maż-żewġ kowċis rispettivi kif ukoll mal-aqwa skorers taż-żewġ naħat, it-Taljan Mario Fontanella ta’ Floriana u ż-żagħżugħ ta’ Tarxien misluf mingħand Valletta, Luke Montebello.
