Immaġinak tkun ilek tfaddal dawk il-ftit flus kull tant biex imbagħad issibhom għal xi spiża li tkun trid tagħmel ’il quddiem.
Immaġinak ma tgħidx lil martek jew lil żewġek u tibda ssorrhom bil-moħbi, imma mbagħad jinduna xi ħadd u jagħmillek il-flus trietaq.
Hekk ġralu raġel fiċ-Ċina, bil-ħtija tkun kollha kemm hi ta’ Hali, il-kelb golden retriever ta’ ħames xhur li propjament hu ta’ ħabib tiegħu u li kien qed jgħix mar-raġel u martu għal ftit jiem sakemm sidu kien qed jivvjaġġa.
Qalb ir-raġel kienet se tieqaf meta, malli qam, martu għajtitlu minn kamra oħra wara li rat id-duvet cover imqatta’ biċċiet u mal-biċċiet, karti tal-flus imqatta’ wkoll.
Staqsietu minn fejn kienu ġew dawk il-flus u żewġha qalilha li kien qed ifaddalhom maż-żmien. Il-kelb is-soltu kien jomgħod it-teddy bear tiegħu imma din id-darba nfexx fil-kutra u kull ma kien hemm fiha.
Moħbija bejn il-kutra u l-cover tagħha r-raġel kellu 3,800 yuan, li jġibu €530.
