L-omm ta’ avukat Franċiż li spiċċa maqtul meta grupp ta’ terroristi tal-ISIS attakkaw zoni fiċ-ċentru ta’ Pariġi, fit-13 ta’ Novembru li għadda, akkuża lill-Belġju dwar negliġenza u beħsiebha tressaq il-każ il-qorti.
Ħafna mill-qattiela tal-ISIS li wettqu l-istraġi ta’ Pariġi kellhom nisel Belġjan u l-mara inkwistjoni, Nadine Ribet-Reinhart, temmen li l-awtoritajiet tal-Belġju messhom għamlu aktar fil-konfront tat-terroristi. Hi qalet li ‘r-riżultat tan-nuqqas ta’ azzjoni huma l-familja mkissrin u t-tfal li qatt mhuma se jitwieldu’.
Binha, l-avukat Valentin Ribet, kien wieħed minn 130 persuna li nqatlu fl-attakki koordinati tal-ISIS li heżżew Pariġi fit-13 ta’ Novembru. Hu inqatel mit-terroristi waqt li kien qed jattendi kunċert tal-grupp Eagles of Death Metal li kien għaddej, dak il-ħin, fl-arena tal-Bataclan. It-tfajla tiegħu, Eva, spiċċat midruba iżda kienet salvat b’ħajjitha.
Jaħsbu li ħafna mill-ippjanar għall-attakki kien seħħ fil-Belġju u l-awtoritajiet Belġjani, issa, qalu li identifikaw tliet moħbiet li użaw l-aggressuri ‘ta’ Pariġi’ fis-sigħat qabel huma vvjaġġaw lejn Franza, fit-13 ta’ Novembru.
Ħafna minn dawk it-terroristi kienu nofshom Belġjani u nofshom Marokkini, filwaqt li kellhom rabtiet mad-distrett ta’ Molenbeek ta’ Brussell. Il-kap suspettat tat-terroristi, Abdelhamid Abaaoud, li miet f’Novembru waqt rejd mill-pulizija f’St Denis (sobborg ta’ Pariġi) kien trabba f’Molenbeek waqt li kien attiv f’aġir terroristiku ieħor.
Numru ta’ avukati qalu li l-Belġju, bħala Stat, jista’ jinżamm responsabbli ‘b’konnessjoni mad-dmija ta’ Pariġi’. Iżda biex jirnexxi rikors iridu jinstabu provi konkreti ta’ negliġenza – f’dan is-sens li l-Istat kellu informazzjoni speċifika relatata iżda naqas milli jieħu azzjoni. F’dan il-kaz ukoll l-omm tal-avukat teħtieġ tipprovdi dawn il-provi sinifikanti.
